Berodung


Berodung virun der Adoptioun vun engem Mupp / enger Kaz
Berodung bei der Wiel vun der richteger Rass
Berodung a Begleedung bei der Adoptioun vun engem Déierchen aus 2. Hand





Antas & Bijou

Berodung virun der Adoptioun vun engem Mupp / enger Kaz

- Dir spillt mam Gedanken Iech e Mupp oder eng Kaz unzeschafen?
- Dir wësst net ob et e groussen, e mëttelgroussen oder e klenge Mupp soll sinn?
- E Welpen oder en ausgewuessene Mupp, e Weibchen oder e Männchen?
- Vum Ziichter oder der Famill, wou och d’Muppemamm lieft oder aus dem Déierenasyl, vum Déiereschutz?
- Dir frot Iech ob e kuerzhäregen oder e laanghärege Mupp an d’Haus kënnt?
- Soll de Mupp kannerfrëndlech sinn, sech mat aneren Déiere verdroen, an enger Wunneng oder engem Haus mat groussem Gaart wunnen?
- Ass am Daag een doheem oder nëmmen deelweis, oder de ganzen Dag iwwer guer net?
- Aus wéi ville Persoune besteet Är Famill? – Wéi eng Altersklassen si vertrueden?
- Wéi vill Zäit hutt Dir fir de Mupp? - Wëllt Dir mam Mupp jogge goen, wanderen, Agility maachen oder léiwer um Canapé schmusen?

- Eng Kaz oder e Kueder?
- Eng Rassekaz oder eng ganz normal Europäesch Kuerzhaar?
- Eng kleng vu 6 Wochen oder eng ausgewuessen?
- Kritt d’Kaz Fräilaf oder gëtt et eng Wunnengskaz?
- Wéi vill Zäit hutt Dir fir d’Fleeg vun der Kaz ageplangt?

Virun der Adoptioun vun engem Mupp oder enger Kaz, soll räiflech driwwer nogeduecht ginn an déi uewen opgelëschte Punkten berécksiichtegt ginn!
Et geet heibäi ëm e Liewewiesen, dat een net einfach erëm ëmtausche kann, wann et awer net esou ass, wéi ee sech et virgestallt hat!

Soll et e Rassemupp oder eng Rassekaz sinn, muss gekuckt ginn, wéi eng Eegenschafte vun de Rassen am Beschte bei Iech an Är Famill passen!




Loona

Berodung bei der Wiël vun der richteger Rass

Ier Dir Iech ee Rassemupp oder eng Rassekaz eraussicht, muss folgendes onbedéngt berécksiichtegt ginn:
De Rassemupp dierf net nëmmen nom Augesinn erausgesicht ginn.
Vill Leit kucken an eng Déierenzäitschrëft, fannen dee Mupp super schéin, d'Kanner natierlech nach méi, an da muss et dee sinn a keen aneren!
Gefalen soll d’Déierchen engem natierlech schon, awer passt déi Rass an Är Famill, Äert Ëmfeld, bei Iech perséinlech?
Et steet bei engem Kaf vun engem Rassemupp vill Geld um Spill an d’Schicksal vum Mupp selwer, do soll dach virdrun emol eescht driwer nogeduecht ginn. Schliesslech kann een de Mupp net einfach erem zréck an de Butték ëmtausche goen!

Verschidde Rasse ginn nun mol no bestëmmte Rassekarakteristiken geziicht.
Dat heescht, si goufe fréier fir eng Aarbecht geziicht, woubäi hir Karakteristiken da fir déi Funktioun och duerno ausgewielt goufen an déi erfollegräichste Muppen vun där Kategorie ëmmer erëm matenee geziicht, fir déi Merkmaler nach méi prägnant ze kréien an ze erhalen.
Wielt Dir e Juegdhond, musst Dir a Kaf huelen, datt dee Mupp méi Juegddriff opweist wéi e Wuechthond.
Verléift Dir Iech an déi wonnerschéin, wäiss Häerdeschutzhënn, wéi de Kuvasz, de Montagne des Pyrénées oder den Maremma-Abbruzzese, huelt Dir a Kaf, datt si schei vis-à-vis vu Frieme sinn, si sinn extrem selbststänneg, si beschützen a bewaachen hiren Territorium an sinn immens op Billfreedegkeet geziicht.
...

Ausserdem muss e serieuxen Ziichter gesicht a fonnt ginn, een deen ënner anerem nëmmen 1, maximal 2 verschidde Rassen ziicht, deen nëmmen 1 Worf pro Joer kritt, an op Gendefekter/Ierfdefekter oppasst.

Bei der Auswiel vun enger Rassekaz geet et manner ëm d'Rassemerkmaler wéi bei de Muppen, mee et ginn och do Ënnerscheeder, z.B bei der Fleeg,do ginn et laanghäreg Kazen, déi vill Fleeg brauchen an déi dann och zäitopwenneg ass.
An et ginn och méi energesch a manner energesch Rassekazen, soudatt och dëst eng Iwwerleeëung waert ka sinn.
An natierlech steet och bei de Rassekazen, d’Sich no engem sérieuxen Ziichter un 1.Stell!




Tierheim

Berodung a Begleedung bei der Adoptioun vun engem Déierchen aus 2. Hand

Dir hutt Iech alles ganz genau durch de Kapp goe gelooss an Iech dofir entscheet ee Mupp oder eng Kaz aus dem Déierenasyl oder vum Déiereschutz z’iwwerhuelen.
Dozou kann een Iech nemme begléckwënschen!
Déi uewegestallte Froe sinn dee Moment schon all beäntwert an Dir sidd Iech elo bewosst, datt Dir héichstwahrscheinlech e Mupp oder eng Kaz mat enger ongewësser Vergaangenheet bei Iech huelt.
Dëst ka méi oder manner schlëmm sinn a sech och méi oder manner schlëmm op d’Verhalen vum Mupp a vun der Kaz auswierken.
Ech stinn zu Ärer Verfügung, ginn op Wonsch mat d’Déier ukucken, an d’Déierenasyl oder bei den Déiereschutz, ech kann Iech och no der Adoptioun nach gäre weiderbegleeden an Iech mat Rot an Dot zur Säit stoen, fir datt de Mupp/d’Kaz sech gutt bei Iech alieft a keng Mëssverständnesser entstinn.










info@pet-psy-cafe.eu