Ausdrocksverhalen


Gesichtsausdruck Op der ganzer Welt ginn et 116 offiziell Sproochen, (inoffiziell, a vill dovunner vum Ausstierwe bedrot, ëm déi 6.500!!), déi mir Mënschen eis zougeluecht hunn, fir eis ënnerteneen ze verstännegen.
D’Déiere verstännege sech ënnert sech an hirer Sprooch, enger Sprooch ouni Wierder!
Si follegen nach ganz hirem Urinstinkt, dee mir scho längst um Wee vun der Zivilisatioun vergiess an ofgeluecht hunn.
Fir d’Kommunikatioun tëschent dem Mënsch a sengem Mupp ze fërderen, ass deen effizientste Wee wahrscheinlech, datt de Mënsch dem Mupp seng Sprooch léiert wéi datt mer lo wëllen ufänken, de Mupp schwätzen ze léieren!
Den Urpapp vum Mupp, sou wéi mir en hautdesdaags kennen, de Wollef, huet ongeféier 60 verschidde Mimiken!
Op kuerz Entfernung kommunizéieren eis Muppen haaptsächlech iwwer taktil an optesch Signaler. Si beobachten och eis Kierperhaltung a –sprooch andauernd.
Akustesch Signaler, wéi Grommelen oder Billen, gi just zousätzlech agesat.
D’Muppe benotzen hire ganze Kierper fir Signaler auszesenden. Zur Mimik zielen d‘Aen, d’Oueren, d’Stier, d’Lëpsen, an den Nueseréck. Zur Gestik dann éischter de Rescht vum Kierper, d’Haltung, d’Beweegung, d’Haltung vum Kapp a vum Schwanz.
D’Kommunikatioun gëtt erschwéiert duerch d'Rassebildunge vum Mënsch.
Doduerch datt et Muppe gëtt, déi e kupéierte Schwanz hunn oder ouni op d’Welt kommen, ass et fir dee géigeniwwerstoende Mupp oder Mënsch méi schwéier hir Stëmmung ze deiten.
D’Muppe wéi Bulldoggen oder e Mops, mat kuerzen, platte Schnuffen, hunn och manner Méiglechkeete mat der Mimik hir „Laun“ auszedrécken.
Dëst kann zu Probleemer féiere wann de Mënsch net „hondësch“ geléiert huet an de Mupp géigeniwwer anere Muppen net genuch, schlecht oder guer net sozialiséiert gouf, soudatt hien aner „Muppendialekter“ net verstoen an/oder deite kann.


Schwanzhaltung Wa mir Mënschen eis géifen e Ruck ginn a vun där Iddi erofgéinge kommen, datt de Mupp dat ze maachen huet wat de Mënsch him seet a soss näischt, da wier der Hallschent vun de Probleemer scho virgebaut!
Wa mir elo och nach verstinn, datt mir éischter déi intellektuell Kapazitéiten hunn, dem Mupp seng Sprooch ze léieren wéi datt heen eis Sprooch léiert, hu mer déi aner Hallschent och schonn an Ugrëff geholl!

Wa mir eise Kanner bäibréngen, datt si bei „rout“ net dierfen iwwer d’Strooss goen, datt si eng waarm Kachplaque net däerfen upaken oder datt si net dierfe mat frieme Leit schwätzen, firwat brénge mer et dann net faerdeg, eise Kanner ze soen:
Géi ni direkt op e Mupp duer!,
Pak ni e Mupp un, deens de net kenns!

- an doriwwer eraus:
wann de Mupp esou an esou do steet oder dat an dat mécht, dann ass hie frou oder hie fäert oder hien ass gestresst?

Kaz Fir weider Informatiounen iwwer dëst Virhunn, kuckt ënnert Virträg... Dëst Wëssen iwwert d’Ausdrocksverhale vun de Muppen an hir Sprooch ka sou villen Aggressiounen an Mëssverständnesser virbauen!
Fir Är Sécherheet, äre Kanner an äre Muppen hir Sécherheet!

Natierlech gëllt datselwecht och fir d‘Kaz. De Sachverhalt ass just een aneren. Vu datt d‘Kaz ee manner sozialiséiert Déier ass a kee Juegd- oder Beutefaangverhalen vis-à-vis vun de Mënsche weist, stellt se fir eis keng direkt Gefor duer.
Mee och d’Kaz huet hiert Ausdrocksverhalen !

















info@pet-psy-cafe.eu