Rasseproblematik


Antas & Neo Ëmmer erëm liese mer an de Medien, datt e bluttrünstegt Béischt, eng Kampfmaschinn, eng Bestie, och nach bekannt ënnert dem Numm: Kampfhond!, ee Kand zerfleescht huet.
Natierlech ass déi Tragedie einfach esou geschitt. Keen huet eppes gemaach, oder eppes gesinn!
Dat wëllt Béischt ass ouni Grond an ouni Unzeechen iwwert d’Affer hirgefall!
Wéi soe se sou schéin: Wer’s glaubt, wird selig!

Als éischt e bëssen Hannergrondinformatiounen:
Deemols am Joer 2000 ass et ugaangen, zu Hamburg an Däitschland, wou e 6-Joer ale Bouf vun engem Staffordshire an engem Pitbull ugegraff an doutgebass gouf.
Wat kee wousst, de Besëtzer war virbestrooft a seng Muppen durch fréier Bäissvirfäll bekannt. De Besëtzer huet net op d’Behërde gelauschtert a sech geweigert de Muppen Maulkierf unzedinn a se un der Léngt ze halen. Si ware scho virun dësem Virfall an aner Bäissereie verwéckelt.

D’Ëffentlechkeet geréit a Panik!
D’Politiker loossen d’Muskele spillen a sëtze sech direkt un nei streng a verschäerfte Veruerdnungen!
48 Stonnen duerno loung déi 1. Veruerdnung zu Hamburg um Dësch!
Den deemolege Buergermeeschter vun Hamburg, Ortwin Runde (SPD), sot: “Wir wollen Kampfhunde aus der Stadt weg haben!“
14 Mupperassen dierfe vun deem Moment u just nach mat Maulkuerf an an der Léngt op d’Strooss a Pitbull an American Staffordshire Terrier dierfe just nach ënner ganz strengen Oplage gehale ginn.
Am Abrëll 2001 verbitt déi Däitsch Bundesregierung d’Aféiere vu véier Mupperasse: Pit Bull Terrier, American Staffordshire Terrier, Staffordshire-Bullterrier a Bullterrier!
Op d’Aféieren trotz Verbuet stinn 2 Joer Prisong!
Kontrolleren dierfen d’Grondstécker an d’Wunnenge betrieden!
All aner Bundeslänner verschäerfen hir Regelen eenzel: Léngtzwang, Maulkuerfzwang, streng Zuucht- an Haltungsverbueder, d’Muppe gi gechippt, an d’Protokoller op 50.000 Euro erhéicht.
Dausende vun potenziell geféierleche Muppen ginn ageschléifert.


Antas & Neo Wat huet sech verännert?
D’Leit hunn Angscht viru Kampfhënn, déi et net ginn, d’Kanner iwwerhuelen dës Angscht vun den Elteren an hirem Ëmfeld, déi ganz Gesellschaft huet eng falsch Meenung vun de Muppen am Allgemengen!
Onwëssender loosse sech vun den Titelen aus de Medien hypnotiséieren, si gleewen alles, d’Politiker soen datselwecht, da muss et jo bal stëmmen, si wëllen eis jo just virun deene Bestie schützen.
Et gi manner Pitbullen, Rottweiler, American Staffordshire Terrier an eiser Gesellschaft oder si sëtzen aarmséileg an engem Déierenasyl, well se näischt verbrach hunn, ausser ënnert där Rass op d’Welt komm ze sinn!
Wat sinn d’Tatsaachen?
Als éischt Mol eng erschreckend Wourecht: ALL Mupp ka bäissen!
Awer liesen oder gesi mer och spektakulär Geschichten a Berichter an den Zeitungen oder um Fernseh, wann een Dackel een an e Fanger pëtzt, oder e Yorkshire Terrier een Jogger an d’Wued pëtzt?
Dat si jo keng Kampfhënn a potenziell ongeféierlech, déi wollte bestëmmt nemmen spillen!!!
Da si vun de Bäissattacken meeschtens Kanner betraff.
Firwat? Ma ganz einfach, well méi wéi ¾ vun alle Muppen a Famille mat Kanner ënner 14 Joer liewen.
Vun deenen 30.000 bis 50.000 Bëssverletzungen, déi all Joer an Däitschland behandelt ginn, si méi wéi 50% Kanner betraff. Dozou däerfe mer déi onbekannten héich Donkelziffer net vergiessen!!!
Enger Studie vum Kannerakzidents-Fuerschungszentrum vun der Uni-Klinik fir Kannerchirurgie am Éisterräichesche Graz huet erginn, dass 73% vun de Bäissvirfäll mat Muppe geschéien, déi d‘Kanner kennen a meeschtens geschéie se beim Mupp doheem.

24% vun de Kanner gi vum eegene Mupp gebass, nëmme 15% vun engem komplett frieme Mupp!
73% vun de Kanner ware beim Zäitpunkt vum Akzident ënner 10 Joer al.
28% vun de Kanner hu mam Mupp gespillt, wéi et geschitt ass, 14% si laanscht de Mupp gaangen, 10% hu mam Mupp geschmust an 8% hunn e gefiddert.
A 74% ginn der Bäissattack eng Interaktioun mam Mupp viraus!


Antas & Jerry Ginn et geféierlech Rassen?
Definitiv : Nee!
Där Meenung si virun allem Experten, sou wéi d’Dr. Dorit Feddersen-Petersen, Fuerscherin fir Verhalen op der Universitéit Kiel. Si seet och zu dësem Thema ënnert anerem: “Eine Fehleinschätzung wird nicht dadurch besser, dass man sie ständig wiederholt!“. Studien beleën, dass vu Familjenmuppen datselwecht Gefährdungspotenzial ausgeet ewéi vu vermeintlech geféierlechen Rassen.
Natierlech bäisst ee 40Kilo-Mupp méi fest zou ewéi en 2,5Kilo-Mupp!
Mir brauchen definitiv keng Rasselëschten!
Si féieren zu näischt, well all Hond potenziell geféierlech ka gin a bäisse kann!

Ausserdem ass nach keen op d’Iddi komm, dass de Feeler beim Mënsch leie kéint?
Ass de Mënsch sou arrogant an onfeelbar?
Et ass um Mënsch säi Mupp 100% ënner Kontroll ze hunn.
Et gi Muppe fir „Ufänger“ an et ginn der, do muss een eng gewëssen Erfarung matbréngen!
Nët all Rass passt zu all Mënsch, zu all Ëmfeld an all Famill!
Zur Hëllef an Ennerstëtzung ginn et Déierendokteren, Déierepsychologen, Verhalensberoder, a Muppeschoulen.
Verurteelt nët no Rass an Ausgesinn, mee no Charakter a Wiesen!. Dat Recht huet all Liewewiesen!



"Auschwitz fängt da an, wo einer steht und denkt, es sind ja nur Tiere."
Theodor W. Adorno






info@pet-psy-cafe.eu